انا باتخيل نفسى مكان اى شاب طموح كافحت واهلى كمان اتعذبوا واتحملوا مالا يطاق وصرفوا النفيس والغالى على تربيتى وتعليمى لحد ما قدرت اتعلم واقتنص وظيفه رغم العدد المهول من الشباب اللى بيعانى من البطالة و قدرت بتوفيق الله تعالى ووقوف مراتى بجانبى انى اتجاوز كل عقبات الزواج من شقه وتكاليف زواج
وتخيلت انى بدات اعيش انا ومراتى فى بيت واحد وماعنديش غيرمرتب الوظيفه البسيط اللى صعب اى خبير اقتصادى يقدر يحل مشكلة توازن الدخل مع الانفاق بس ساعتها انا قررت التحدى
وتخيلت نظمنا نفسنا وحياتنا انا وهى ان تكون العيشه على اد المرتب البسيط ومن وقت للتانى نصبر نفسنا ان كل ديقة لازم هايكون بعدها وسعه بس ده مايمنعشى انى كنت باقارن نفسى ومستوى معيشتى مع اى شاب تانى ابن راجل اعمال مثلا او مسئول كبير و الفرق الصارخ بينى وبينه فى كل حاجه والسؤال هنا..
ايه الفرق بينى وبينه؟؟؟
ليه هو مصرى من ولادها ومتمتع بخيرها .....هوانا كمان مش مصرى من ولادها ؟؟؟
ليه انا غريب فى دروبها الجوع قصادى والخوف مكلبش ايديا ؟
ليه الخوف اللى ييزل النفس ويزيد كروبها مصاحبنى ؟
وكنت باتشجع واخد كام حبة شجاعة وااقول كلام الشاعر المشهور
ياقوة الله حلى فى عروقى حلى
خلينى اتبت فيكى واثبت محلى
وحلى عنى يارعشة الرعب حلى
لاجل ان اصد الجوع عنى
وتخيلت ان المرتب البسيط اللى كنت مظبط نفسى عليه فى وقت من الاوقات مابقاش يكفى مع ارتفاع الاسعارالجنونى وكمان رزق من عند الله باول مولود
وتخيلت انى حطيت ابنى قدامى اللى ماكملش ايام وقولت له تانى نفس كلام الشاعر
يافرحتى البكرية ده ماكانش يومك؟
ليه ماتت الفرحه فى قلبى قبل ماتتولد ؟
ليه الفرحه فرفرت من بين ايديا ؟
ليه ارجع تانى اندغ همومى ده الفقر كافر والظلم كافر؟
و لحد ا متى هافضل اعافر ؟
وفى الاخرلاقيت نفسى قتيل وماليش ديه
وتخيلت انى قررت انى ادور على وظيفه اخرى لتلبية الحاجات الضروريه والاساسية فقط فى حياتنا رغم انى فيه بعض الناس غيرى عايشه فى رفاهيه ورغد ونعيم مالوش حدود وكمان الاغراب بياكلوا لحمنا ويحرمونا وبيشربوا من سيل عرقنا ودمانا وتجاهلهم واحتكارهم لينا كانه كرباج بيهوى علينا يوقعنا ولاحد يقدر يقومنا نصلب حيلنا من الالم ومن
همومنا اللى مكومانا
وتخيلت مدى الالم وكمان معافرتى فى الحياه وفى نفس الوقت التحدى اللى جويا وتمسكى بالامل وقررت ساعتها انى
مش لازم اموت لان انا فى رقبتى عيله محتاجه القوت
مش لازم اموت قبل ميعادى المثبوت
لازم افر بعمرى وافوت
لازم احقق حلمى فى ابنى الموعود
وتخيلت شكل و مرارة الايام وهى بتمر كلها شبه بعضها شقا وعذاب وحرمان وتضرعى وتقربى لربنا لمساعدتى على التحمل وتثبيتى رغم ابتلائى ومحنتى
وتخيلت انى قدرت ببركة الله سبحانه وتعالى انى ااقدر اربى ابنى واعلمه يكون فرد صالح مؤمن بربنا مخلص ومحب لبلده ولدينه وأمته ويكون من المتفوقين والاول على دفعته
وتخيلت ابنى وهو بيحضنى وبيبوس ايدى ويقول لى ان الاوان يا ابويا اهون عليك حرمانك ومحنتك ارمى عليا حمولك كلها الله سبحانه وتعالى يعينا عليها وندوق سوا الفرحه بروحنا وعينينا كلنا
وتخيلت دنيا جديده بتتفتح وتاخدنى بافتح لها عينى وقلبى وروحى
دنيا جديده نفتح لها الاحضان ونجرى عليها تكون اخرة الحزن وبداية وجودنا
دنيا جديدة باخدها فى حضنى الاقى حزنى فيها داب وطابت فيها جروحى والامى
دنيا جديده بتنفتح لى دروبها باجرى فيها من شروقها لغروبها
دنيا جديده سماها مفتوحه لينا وقمرها منور لينا ونجومها بتنادينا ولابد نوصل ليها كلنا
وتخيلت انى ساجد شاكر لربنا سبحانه وتعالى بحمده على كل اللى حصل لينا كلنا
وتخيلت انا ماشى ومشبك ايدى فى ايد ابنى والفرحه بتنط من عنيا واللسان بيزغرد ويغنى احلى اغنية ويتقدم ابنى وانا للكلية بكل ثقة وفخرعشان هو ألاولى بالتعيين من الناس كلها هو الاول على دفعته وكمان هو فارس الكليه كلها جواه طموح ورغبه لتحصيل العلم لخدمة نفسه وامته والناس برده كلها.
لاقينا كل اللى يقابلنا يسالنا هل احنا بكامل قوانا العقليه كلها ولا بعضها مش فاهمين ليه بعض الناس بتتهمنا بالجنون والبعض التانى بينظر لينا بعين الاشفاق والسخرية و لاقينا انه مرفوض هو و طلبه كانه مالهوش وجود فى الدنيا كلها ومش عارفين ايه هو السر الكبير اللى جننا كلنا؟
واخيرا عرفنا السر وهو ان الكلية بقت وسية مش كلية واللى يتعين لازم يكون ابن استاذ من الكليه حتى لو كان ابنه ترتيبه الاخير ومايفهمش حتى فى البتنجان والكوسه والملوخية حتى لو كان سفيه او معتوه او عنده شى ء من الجنان المهم نحقق مبدا الوراثة اللى اتفشى فى مجتمعنا وبقى مبدا وحقيقة فى حياتنا كلها ده قانون بيسرى على العباد كلها محفور فى صدر كل مسئول او صاحب وسيه عندنا
فيجب ان يكون ابن استاذ الجامعة استاذ زيه وابن الدكتور دكتور زيه وابن السفير لازم يكون سفير وابن المستشار اكيد هايكون زيه مستشاروالعسكر ولادهم لازم يكونوا عسكر وحتى ابن رئيس الناس كلها والحاكم بامره على العباد كلهم لازم يكون زيه رئيس الناس كلها وياويله من يتجرا وياخد حق من الحقوق الوراثية لاى مسئول او صاحب منصب عايش فى وسيته كده اخترق القانون وانتهك حريات اصحاب الوسيات كلها وساعتها ممكن يروح الواق واق او حتى يتقطع ويكون اكل للكلاب او يتجنن ويقول ماء ماء
مش مهم الكفاءة ولا الخبره ولا العلم كل ده مافيش منه فايده الكلام ده كان زمان وراح وبقى خلاص من الفلكلور والتراث المهم الفقاقه والفهلوة والنسب لاى منصب او وظيفة ويكون من اصحاب الدم الازرق هو ده الاهم الشخص بنسبه هايكون اهل للثقه وعالم كبير فى الذره وكمان اكبر خبير فى الاقتصاد والفتوى
وتخيلت ابنى وهو واقف مقهور والدموع فى عينه وجواها لوم كبير ليا انى بسيط وعلى اد حالى مش صاحب وسية يبرتع فيها ويورثها قدام الناس كلها
وتخيلت ابنى وهو واقف مقهور والدموع فى عينه وجواها لوم كبير ليا انى بسيط وعلى اد حالى مش صاحب وسية يبرتع فيها ويورثها قدام الناس كلها
وتخيلت ابنى وهو شايف حلمه اغتصب وهو لاحول ولا قوة واللى اغتصبه بكل بجاحه وتحدى مطلع لسانه من غير حياء ولا خشا ومعلق على صدره يافطه بفصيلة دمه الزرقا وكمان ماسك فى ايده لوحه مرسوم عليها شجرة بنسبه ونسله اللى بيها بقى فوق رؤوس الناس كلها
وتخيلت نفسى ان قلبى انخلع منى وانا باتخيل صدمة ابنى و كمان صدمتى اللى هى اشد واقوى وبقيت ابكى و اصرخ وااقول
ابكى ياريح ونوحى وطوحينا بقينا غربا فى بلادنا وحقوقنا ضاعت من ايدينا
وسالت نفسى لحد امتى يادنيا هاتفضلى تسوحينا؟؟؟
وتخيلت نفسى باندب على حظى وعلى نسبى وعيلتى وباقول
وسالت نفسى لحد امتى يادنيا هاتفضلى تسوحينا؟؟؟
وتخيلت نفسى باندب على حظى وعلى نسبى وعيلتى وباقول
دى الفرحه كانت جايه ويادوب بافتح رموشى لاقيتها رايحه وروحى رايحه تجرى وراها
وتخيلت ابنى وهو يائس ومقرر انه يسيب بلده مقلوبه عاليها واطيها ويهاجر اى بلد تانى تحترم ادميته وتقدرعلمه وكفاءته اللى كان نفسه يرد بيه جزء بسيط من افضال بلده عليه ويمكن يكون زويل من مئات الزووايل اللى طفشت ونفدت بجلدها
اليقين
يقينى هنا انى هارفض انى اتخلى عن ابنى وعن حلمى معاه وهاقوله
دى بلدنا احنا ومش وسية ومش هانقبل نكون عبيد لان ربنا سبحانه وتعالى سوا الناس كلهم سواسيه واننا اتولدنا زى النبات ابرياء لا رضعنا كدب ولا اتفطمنا برياء ولازم نواجه كل همومنا ومشاكلنا بالصدق والكبرياء ونيعيش زى الشجر اللى بيموت وهو واقف فى مطرحه ولابينحنى لمخلوق بشر او حجر وبيكبرويشب لفوق مهما الزمان جرحه ماينفعش نهجر بلدنا ونسيبها لغيرنا دى بتاعتنا احنا مش هانتزحزح من مكانا حتى لو متنا فى مطرحنا
فالتوريث فى حياتنا الامثلة عليه عديده ولا حصر لها فهو فى الجامعات واجهزة الاعلام والسلك الدبلوماسى والشركات والهيئات الرسمية والحكومية والقضائية حتى فى المهن الحره مثل الطب والصيدله والهندسة والمحاماه وكذلك مهن المواهب اياها التى تحتاج ابداعات شديدة الخصوصية مثل التمثيل والغناء والفن بوجه عام ووصل ايضا التوريث للرياضه بكل مجالاتها فالتوريث اصبح لا يقتصر على اعلى المناصب القيادية المهمة فقط بل وصل الى ادناها ايضا حتى من يقوم بأعمال النظافة وعمل الشاي والقهوة
فمثلا رغم أن الرسول صلى الله عليه وسلم قدم أبا بكر لإمامة الناس في الصلاة إلا أنه بعد وفاته، حدثت خلافات حول ترشيح ابي بكر للخلافة، وكان هناك من يرفض مبايعته وحدث جدل كبير حتى تقدم عمر بن الخطاب وبايع ابا بكر على الخلافة، وهذا يؤكد أن الأمر شورى فى الإسلام وليست به قاعدة فقهية تجيز التوريث أو تمنعه.
و لو كان هناك توريث لقدم ابا بكر ابنه للخلافة ولكن هذا لم يحدث. وقبل أن يتوفى رشح عمر بن الخطاب ولم يفرضه فرضا على جموع المسلمين، بل اختاره الناس طواعية وبايعوه وبعد أن توفى عمر بن الخطاب رشح ستة من الصحابة رضوان الله عليهم على أن يتم اختيار واحد منهم بالتشاور" فالامر شورى"
التوريث بالشكل الحالى هو توريث ما لانملكه الى اولادنا ومن يخصونا فالمؤسسة الحكومية ليست عزبة خاصه او وسية لمن يراسها يفعل بها مايريد فهى ملك لنا جميعا لازم بلدنا ترجع تانى حره ابيه مش لفئة معينه وديولهم لازم نلفظ اسلوب التوريث من حياتنا لها يجب ان يكون العلم والكفاءة هو مقياس حكمنا لتقييم الاشخاص يجب انا نختار من يمثلنا ويقودنا ولا نقبل ان يفرض او يملى علينا احد الا بالكفاءة والمقدرة والعلم حتى لو كان مش من اصحاب الدماء الزرقاء ومن ابسط الناس
انا املى فى ربنا كبير وفينا اننا مايكونش عندنا وسيه كل من هب ودب يورث فيها والتوريث مايبقاش ليه مكان فى بكره وايامنا الجايه لاولادنا ولينا
كلنا مصريين
كلنا ولاد مصر
كلنا مصر هى امنا
كلنا بنحب بلدنا مصر
43 comments:
امممممممممم
شوف
هو موضوع كبير اوي
ومش عارفة لو انت في مكان السفير ولا المدير ولا الوزير هتعمل في ابنك ايه ؟
تخيلاتك صعبة اوي ويمكن اثرت عليا جدا
لكن يقينك انها بلدك
بلدنا كلنا
لازم نعيش
ونعيش صح
هو ده الصح
تحياني
ياالله
قريت وحلمت وتخيلت وفي الاخر يئست ...
ورجع دب فيا الامل لكنه من تاني مات..
عندي يقين ان كل كلامك صح
وعندي يقين اكبر ان مفيش فايده من الكلام بس
وعشان كده بقول ... هنعمل ايه ؟؟
هل تعتقد ان الحل في عدم التوريث..
لو حصل يبقى احنا السبب ..
بس هقولك ايه ..احنا فقدنا الامل في التغيير
لأننا اتعودنا خلاص على فقدان الامل واتعودنا على وأد الاحلام وهي لسه في مهدها
اتعلمنا نخاف وبس
بس فيه سؤال بيدور في ذهني دايما
هلى تعتقد ان فيه حد هيقدر يحكم شعب تفشى فيه الفساد بالشكل دا
يا استاذ
لو صلحت الرعية لصلح الحاكم
تحياتي لخيالك واسع الافق
ونأمل ان حالنا ينصلح
وربنا يخلصنا
بس مش هينصلح الا لو انصلحنا
احنا لان بجد الموضوع صعب
تقبل تحياتي يامستنصر
الاستاذه كوتشيا
اهلا بيكى باستمرا فى اليقين صدقينى لو انا مسؤل وابنى مش اهل لوظيفه مش هايكون ليا دور ابدا انى الحقه بيها لانه هايكون شخص فاشل فى مكان هايكون محكوم عليه بالفشل برده لازم ابنى بعتمد على نفسه وكفاءته ونظام التوريث هايكون فيه فساد مجتمعنا وهلاكه وهلاكنا كلنا
تحياتى ليكى
الاستاذه حبيبة القمر
سعيد جدا بتشريف حضرتك لليقين
وانا مش معاكى انا مش يائس انا عندى امل كبير فى بكره اننا هانقدر نتخلص من كل عيوبنا ومن الفساد اللى انتشر بينا
تحياتى واتمنى زيارتك باستمرار
الاستاذه روح
باكون سعيد جدا بكلامك لانه فى الغالب بيكون وجهة نظرى انا كمان فى بينا تشابه كبير فى الاراء
يارب فعلا نتخلص من مبدا وفلسفة التوريث لانه دخيل علينا وعى مجتمعنا فيه نهايتنا كلنا وتاخرنا
تحياتى
بوست جميل
ومدونة رائعة
ربنا يحفظلك ابنك
ويحققلك كل أحلامك
وقد صدقت في رفضك للتوريث
في أي مكان وأي منصب
فلماذا اولاد الطبيب أطباء
وأولاد الفلاح فلاحون
وأولاد الزعيم زعماء
عليهم ان يتركوا الحرية لأبنائهم
فذلك سيعطي تنوعا يثري جميع مجالات الحياة
ونضع الشخص المناسب في المكان المناسب
تحياتي
انا يقيني ان الامور لازم ترجع لنصابها تاني
والظلم لازم له نهاية
وربنا ان شاء الله هيفرجها
بس احنا لازم نتقيه الاول في كل امورنا علشان يعيننا وينصرنا
جزاكم الله خيرا علي هذة المدونة القيمة
واسمحلي ازوك دائما بس يارب اكون ضيف خفيف
العجوز
الاستاذه شهر زاد
شكرا لتشريفك انا فعلا معاكى التوريث مرفوض شكلا وموضوعا فى كل مجالات حياتنا
الحريه شىء لا يتجزا فبها نستطيع ان نتقدم الى حياة كريمة
ارجو مزيد ومزيد من الزيارات
تحياتى
الاستاذه عطر الليل
انا مع العسر يسرا
ان شاء الله الجاى احلى واحسن والامل فينا وفى ربنا كبير
شكرا لتشربفك اليقين
تحياتى
الاستاذ احمد العجوز
شكرا ليك وشكرا على تشريفك اليقين
ووجودك هنا ده شرف لينا
يارب تكون موجود معانا باستمرار
تحياتى
ممكن على بال ما تربي ابنك يكون ربنا صلح الحال
الاستاذ الكبير عصفور المدينة
شكرا على زيارت الغالية
ويارب الاحوال تنصلح ده حلم كبير وامنية غالية
جزاك الله كل خير تحياتى
الكلام اللى فى الاول احلام ورديه عش العصفوره واللقمه الهنيه تكفى ميه
والكلام اللى فى النص فعلا يوميات اتنين متزوجين قرفوا من الحياه والغلاء وعجز سد احتياجات الاسره
اما اليقين انا متفقه معاك فيه قوى دى بلدنا
خيرتاها لينا بس احنا لازم نتعب برده من اجلها ونخليها اجمل حاجه بس ازاى والفساد ده موجود لازم نحرر نفسنا من الفساد ده
وبعدج كده مصر تبقى بتعتنا ونروقها نخليها احلى عروسه
تحياتى ولاء
ربنا يباركلك فى زوجتك وابنك وصدقنى حتى الللى هيورثوا فلوس ومناصب عمرهم ماهيورثوا زوجه زي زوجتك ولا ابن انت مرابيه على اخلاق وقيم ومبادئ زي ابنك
مدونه رائعه حقيقه
استاذه ولاء
الله كلامك فعلا جميل لازم نحرر بلدنا من الفساد والمفسدين دى بلدنا واحنا اولى بيها كلنا
سعيد جدا بتواصلك معايا وتشريفك اليقين لانه شرف كبير
تحياتى
الاستاذه جىجى
شكرا على المجاملة الرقيقة
فعلا عندك حق لا ورث مناصب ولا فلوس هاتنفع يوم العرض على الله سبحانه وتعالى مش هاينفع غير العمل الصالح
شرف كبير وجودك فى اليقين واتمنى تكرار الزيارات
تحياتى
يا ريت ما تخيلت
تعبت عقلك وفكرك
لوكن طالما اليقين موجود لازم نتمسك به
موضوع جميل كالعادة ومن ردك على التعليقات عرفت انك بخير
عجبنى ردك على جىجى قوى وكمان الانسان طالما عارف انه هناك عرض على رب العزة وحساب فليه الظلم والكدب وخلف الوعد وجرح مشاعر الاخرين
ياريت الناس تعامل ربنا الحياه هاتفرق كتير
ربنا يوفقك ويكرمك اللهم امين
شكرا ليك جدااااا
جزاك الله خيرا على كل شئ
بوست مميز اخى العزيز
ولو طال ظلم الظالم لية يوم وكما تدين تدان
اهنيك واحيك على كلامك
تحياتى
السلام عليكم...
ما شاء الله لا قوة الا بالله مدونة جميلةوبوست اكثر من رائع رغم انه قلب علينا المواجع جدااا
الا انك وفقت فعلا فى كتابته واعتقد ان اللى قولته مش تخيلات ده واقع بيعيشه كل شباب مصر من الطبقة العادية بس ارجع واقول اننا السبب فى كل اللى بيحصل ده ببعدنا عن دينا واخلاق رسولنا صلى الله عليه وسلم
جزاك الله خيرا وتقبل مرورى
طبعا كلامك كله للاسف امر واقع كلنا عشيشنه لكن طول ما فى واسطة ومحسوبية
طول ما فى رشوة وفساد
طول ما فى انت مش عارف انا ابن مين
شكلنا هنعيش حياتنا على التخيلات
تحياتى
بص على ابن ابن ابنك ان شاء الله هيكون ربنا صلح الحال
اولا : مش عارفة هيكون رد فعلك على كومنى ايه لانى اول مرة اجرب اكتبلك هنا و اوقولك تعليقى
ثانيا : مش جديد اللى هقوله لانهااتقالت قبلى فى كل الكومنتات
ثالثا : عارفة انه اول بوست يتكتب ويتنشر قبل م اقراه و للاسف هو كان الاهم وجبتلى بيه احباط مش عارفة ليه لما تخيلت كل كلامك وقف فى بالى نقطة مهمة ناقشتها معاك لما كلمتنى عن البوست فعلا يمكن كلامك صح ان لكل قاعدة شواذ بس ليه الابن ده طلع زيى باباه او مامته مش يمكن لان البيت كله بيدول فى فلك مجال معين ف تشبع بيه و حبه و تفوق فى حاجة حبها ودى نشاذ القاعدة يعنى تورثها عن حب منهم و تفانى
رابعا : وده الاهم واللى مقدرتش اسأله ليك .. انت ليه مسألتنيش عن احلامى لابنى فى بكرة مش هو ابنى زى م هو ابنك صحيح البوست عجبى فى المجمل بس انت اخدت كل وجهة النظر من عيونك انت لوحدك فى شخص تانى بيقاسمك كل ده فى الحياه حتى احلامك لآولادك
الموضوع فعلا محتاج وقفات تصحيحية كتير جدا منا تجاه انفسنا وتجاه سلوكيتنا وحتى تجاة وطنا حتى نحدد هدفنا ونعسى لتحقيقة باصرار
ربنا يحفظ لك ابنك ويكون المستقبل افضل باذن الله تعالى
كل الاحترام
هى دى مصر يا فوزيه
هى دى بلدنا
بحلوها وبمرها
__________________________________
ميفوتكش البوست الجديد (عدنا من الامتحانات)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
السلام عليكم
والله نفسى اقولك انت مزودها شوية
خليك متفائل وبص على نص الكوباية المليان
بس الحقيقة ان الكوباية فاضية خالص وقربت تنكسر كمان
ربنا يستر
سلالالالالالالالالالالالالالالالالالالالالالالام
الاستاذه رفقة عمر
ربنا يكفيكى شر الظلم والكدب وخلف الوعد وجرح مشاعر الاخرين
شكرا لزيارتك
يارب تكرريها وماتحرمناش من تصريحاتك وتلميحاتك الهايلة
تحياتى
الاستاذ تامر نبيل
شكرا على مرورك وزياراتك الجميله لليقين
صدقنى كلامك فى مدونتك انتى اجمل
تحياتى
الاستاذه قطوف
انا سعيد جدا بزيارتك ويارب تتكرر
تحياتى
الاستاذه قطة الصحرا
يارب فعلا نتخلص من المحسوبيه والواسطه والفساد علشان يكون فيه تكافؤ فرص وكل زى حق ياخده
سعيد طبعا بوجوده فى اليقين ويارب تستمرى
تحياتى
الاستاذ غزالى
ياه ده انت متشائم جدا
انا كنت فاكر ان ابن ابنى مش هايون له مكان من اصله فى بلدنا
تحياتى
الاستاذه دايان
طبعا باعتذر انى مش قلتلك قبل ما انشر بس انتى كنتى فى الجامعه عشان الماستر والفكره جاتلى وخفت تروح من بالى وهاقولك تانى ناس كتير اولاد ناس عظماء لما اتفرض عليهم الموقف بقم صوره باهته مالهاش لا لون لاو طعم ولا معنى ل ابائهم
تحياتى
الاستاذه نهر الحب
سعيد جدا بتواجد وتواصلك فى اليقين
يارب فعلا نتخلص من كل عيوبنا
تحياتى
الاستاذه صحفية روشة
شكرا لمرورك وتشريفك اليقين
ياريت الاستمرا والتواصل
تحياتى
الاستاذه حدوتة
الكوبايه على وشك الانفجاااااااار
شرفتى اليقين يارب دايما
تحياتى
ربنا يستر ومايحصلش توريث
دى تبقى نكبه
تحياتى لك واسفه على التأخير
الاستاذه رئيسة حزب الاحلام
طول ماكلنا رافضين مبدا التوريث مافيش حد ابدا هايقدر يفرضه علينا
انتى تشرفى فى اى وقت وجدودك شرف كبير
تحياتى
الاستاذ نادر
قفلت المدونةيوم كنت باظبطها يعنى صيانة
انا استحاله ااقدر ااقفلها
انما التوريث هو شىء مرفوض مننا كلنا صدقنى مش هايستمر
تحياتى
Post a Comment