Wednesday, July 23, 2014

يوم ميلادى وثورة يوليو



فتحت عنيا على الدنيا لاقيت ان عيد ميلادى يوم خاص جدا لمصر والمصريين هو 23 يوليو عيد ثورة يوليو المجيدة

اليوم ده مصر كلها بتاخده اجازه وكنت باكون فخور جدا ان عيد ميلادى بيكون كمان اجازه كنت حاسس انى انا اللى باديهم الاجازه
كنت باصحى فى اليوم ده بدرى افتح الراديو عشان اسمع اغانى الثوره ع الدوار لمحمد قنديل وذكريات لعبد الحليم والمارد العربى لفريد الاطرش ووالله وعرفنا الحب لعبد الوهاب واغانى كتيره جدا بحبها اوى لدرجة انى كنت باسجلها وا حفظها كلها وفاكر ان احلى هدية جاتلى من والدى رحمة الله عليه هى مجموعة شرايط كاسيت الاغانى الوطنيه لعبد الحليم وبعد كده الاغانى الوطنيه لعبد الوهاب
وبعد كده افتح التلفزيون عشان اشوف فيلم الثوره اللى بحبه وحافظ حواره بتاع انجى و الظابط على ابن الريس عبد الواحد والبرنس علاء فيلم رد قلبى واستنى لما تقوم الثوره فى الفيلم والريس عبد الواحد المشلول يطلع فى البلكونه ويحرك لسانه واحرك انا كمان لسانى معاه ونقول سوا تحيا الثوره تحيا مصر ساعتها احس ان ابتديت سنه جديده فى حياتى
وباليل باكون مظبط على خروجة منجهه ومحدد مين بالظبط هايكون معايا فى يوم عيد ميلادى ومرتب معاه ومظبط التظابيط
ولاقيت نفسى بحب عبد الناصر جدا وااقول على نفسى انىناصرى من غير ما افهم يعنى ايه ناصريه و بحب الثوره وبحب الظباط الاحرار ظابط ظابط وبحب اتكلم عنها كانى واحد من ظباطها وكانى انا اللى قمت بالثورة
وحفظت مبادىء الثورة السته زى مدرس التاريخ ماقالى وحفظهالى تلاته القضاء على و تلاته اقامة وهى

القضاء على الاقطاع
القضاء على الاستعمار
القضاء على سيطرة رأس المال
إقامة حياة ديمقراطية سليمة
إقامة جيش وطني قوي
إقامة عدالة إجتماعية


لحد ماكبرت وبدات استوعب وارجع تانى لمبادىء الثوره واشوف ايه اللى اتحقق منها فى حياتنا


المبدا الاول القضاء على الاقطاع
ده اكتر وقت مصر عاشت فيه فى الاقطاع لو نظرنا للسلع الاستراتيجية والاحتكار ووقوف الحكومة متفرج مما يعانيه الشعب من احتكار بل صدور القرارات التى تزيد منه وتتوقف عن اصدار القرارات التى تحد منه وتمنعه
ورجل الاحتكار هو رجل من رجال السلطه بكل بجاحه او احد شركاءة او اقربائة حتى يكون بعيد عن الصورة اذا كان لديه شىء من حمرة الخجل
يعنى الاقطاع الحالى اشد قسوة واكثر جرأة بكثير عن ما قبل الثوره بل يمتاز عنه بصدور القوانين واللوائح التى تحميه واعطاء الصلاحيات والحصانات والنفوذ لاصحابه
المهم يتحقق مبدا شيلنى واشيلك وفيد واستفيد
ولنا فى سلعة الحديد خير مثال لانجازات الثوره فى القضاء على الاقطاع والاحتكار
ولاقيت نفسى استرجع صورة الريس عبد الواحد فى الفيلم وااقول تحيا الثورة

المبدأالثانى القضاء على الاستعمار
الاستعمار حاليا موجود وبشكل اخطر من ذى قبل فهو استعمار غير مباشر يتحكم فى القرارت برموت كنترول من عنده ويحرك الرؤساء والملوك والشعوب كعرائس متحركة واصبح الاستعمار استعمار اقتصادى واستعمار سياسى واستعمار ثقافى
فقرارتنا الداخليه وسياستنا الخارجيه يجب ان تدور فى فلك القوه العظمى المسيطره على العالم حتى نكون من اصحاب الاعتدال فى المنطقه ونبعد عن دورنا المحورى والقيادى فى المنطقه وننول العطف ونتجنب الويل وعذاب الامور
هى دى الحريه التى قدم الشعب المصرى فى سبيلها دماء الشهداء والغالى والنفيس تحيا الثوره الاستقلال التام او الموت الزؤام

المبدا الثالث القضاء على سيطرة راس المال
وتم تحقيق ذلك بتاميم ممتلكات كثيرة من اموال اشخاص كل ماجنوه انهم عملوا بجد وتعب واجتهاد حتى تم لهم ذلك وكونوا ثرواتهم فتم نزع ملكيتهم وازلالهم حتى ان كثير منهم كان لا يجد قوت يومه ولايستطيع عيش حياه كريمه هو واهله بدون سبب ارتكبه واستطاع اخرون منهم بالتحايل على القانون بالهروب بالقليل والفتات من اموالهم وعاشت مصر عقود كثيره تدفع ثمن قرارات التاميم بهروب راس المال واحجام المستثمرين خوفا من بطش اصحاب السلطه والحكم بالتاميم للممتلكاتهم واموالهم
والان مصر بتعيش مرحلة غير مسبوقه من سيطرة راس المال عن زى قبل فالممتلكات التى تم تاميمها من اصحابها تم توزيعها وبيعها بتراب الفلوس تحت بند الخصخصة على فئة اقل مايقال عنها انها فئة من المقربين والمنتفعين والمحظوظين
فى جو اقتصادى فاسد اصبحت الرشوه فيه عموله مستحقه والمحسوبيه والتمييز للاقارب على حساب المال العام ومصلحة الوطن حق مكتسب وشركات القطاع العام ومؤسساته اصبحت عزب ووسيات شخصيه للرؤساء واصحاب النفوذ
تحيا الثوره تحيا الفساد والرشوه والمحسوبيه تحيا انجازات الثورة

المبدا الرابع اقامة حياة ديمقراطية سليمة
فمعروف ان مخطط ظباط الثوره ونسورها حينما قاموا بالثوره ان يتم تسليم السلطة والحكم لمصطفى النحاس او الى تيار سياسى يكون قادر على قيادة مصر باسلوب ديمقراطى وطنى حر ولكن غرور نجاحهم وطمعهم فى الحكم وكذلك خضوع الملك فاروق لهم وخوفه على مصر وشعب مصر من فتنه داخليه وحرب اهليه ادى الى تمسكهم وطمعهم بالحكم والسلطة
فاصبح كل من يقول راىء معارض لهم هو خائن للثوره ومن اعداءها ويذهب وراء الشمس واكتظت السجون بالمواطنين وتم تسجيل المكالمات التيلفونيه وتعيين الجواسيس حتى اصبح كثير من الناس تخشى الخوض والكلام بكل ماهو له صله بالسياسة وهرب كثير من مثقفين مصر ومفكريها للخارج
وكلنا فاكرين انحراف جهاز المخابرات بقيادة صلاح نصر فى تجنيد الممثلات والعاهرات والتجسس على كثير من الشخصيات العامة والمهازل اللى عرفناها سواء فى محاكمة صلاح نصر او محاكمة السيد صفوت الشريف او فى كتاب شاهده على انحرافات صلاح نصر لاعتماد خورشيد


قانون خمسين فى الميه عمال وفلاحين




بما ان والدى كان راجل سياسى ومن ابناء الحزب الحاكم فعندى شوية معلومات عن الانتخابات فمثلا فى انتخابات مجلس الشعب لازم ولابد ان تكون نسبه التمثيل فى مجلس الشعب 50%عمال وفلاحين ولكن بشرط ان يحصل على شهادة محو الاميه حتى لو اشتراها بعشره جنيه وهو مايعرفش الالف من كوز الدره

وخمسين فى الميه الاخرى للمثقفين واصحاب المهن الحره كالدكتور والمحامى وغيرهم

وسالت سؤال ازاى ده انتوا عاوزين مجلس شعب جاهل بقى؟؟؟

المفروض اعضاء المجلس كله من المتعلمين والمثقفين

كان الرد بالعكس يعنى لو نسبة التمثيل ميه فى الميه عمال وفلاحين يجوز انما لا يجوز نسبة المثقفين والمتعلمين تتعدى الخمسين فى المائة ونعم للديمقراطية

ويتبدل الحلم بالديمقراطيه الى كابوس نعيشه حتى الان فى ظل حكم عسكرى

تحيا الثوره تحيا الديكتاتوريه يعيش الاستبداد والموت والسجن لكل من يطالب بالديمقراطيه



المبدا الخامس اقامة جيش وطنى قوى
تم صرف كثير من اموال الشعب على شراء الاسلحه وتحديث الجيش حتى انه تم تسييل االاحتياطى الاستراتيجى من الذهب وفك ودايع الدولة
تم تعيين الرجل الثانى للثوره قائد عام للقوات المسلحه بدون اى خبره او كفاءة لمنصب حساس ومهم ومصيرى فى حياة مصر والمصريين سوى انه من ظباط الثوره وصديق شخصى للرئيس ومن المقربين جدا لديه
تم اجحام الجيش فى حرب اليمن وتم ذبح الكثير من ابنائنا هناك وخسارة كثير من اموالنا واسلحتنا بمبالغ خرافيه فى حرب لا ناقة لينا فيها ولا جمل
تم استدراجنا من قبل اسرائيل لحرب يونيو 67 والمقوله الشهيره التى قالها عبد الناصر لعبد الحكيم عامر اسرائيل هاتضربنا يوم 5 يونيو ياحكيم انت مستعد وعامل حسابك رد عليه وقاله برقبتى ياريس
وكانت مش حرب ولا هزيمه كنت نكسه ووكسه كبيره انضرب سلاح الطيران بكامله على الارض فى المطارات وتتجلى بشاعة النكسه فى القرار العبقرى اللى اتخذه قائد القوات المسلحه لقواته بالانسحاب الفورى بدون خطه او ترتيب مما دفع القوات للانسحاب بشكل عشوائى وكانت عواقبه وخسائرة اكبر واكثر بكتير من خسائر الحرب ذاتها حتى ان اسلحتنا بالكامل استولت عليها اسرائيل جديده لم تستعمل وتم اسر الالوف من جنودنا وقتلهم فى مذابح جماعيه فى تراب سينا
تحيا الثوره تحيا النكسه والوكسه لكل من يشكك فى انجازات ثورتنا المجيده

المبدا السادس اقامة عدالة اجتماعية
بفضل الثوره وانجازاتها اصبح معظم شعب مصر الان فقراء من الطبقه المعدمة واختفت الطبقة الوسطى وتركزت الاموال والثروه فى يد فئة قليلة جدا من ذو القربى والصله باصحاب السلطة والنفوذ وهى لا تتعدى 5 فى الميه من اجمالى الشعب ومن بعض قوانين الثوره لتحقيق العدالة الاجتماعية الاتى


قانون الاصلاح الزراعى

هذا القانون افسد الفلاح فباع الارض المسلوبه من اصحابها وموزعه على الفلاحين بحكم القانون و اشترى التلفزيون والدش وانحصرت الرقعه الزراعيه فى مصر لعدد محدود جدا من الفدادين الزراعية واصبحت معظم الاراضى الزراعيه كتل خرسانيه من المبانى وانهارت الزراعه التى كانت مصدر مهم ورئيسى للدخل القومى وانهارت كثير من الزراعات التى كنا نتميز بها عن باقى العالم مثل القطن المصرى طويل التيله اصبح لا وجود له واصبحنا نستورد ما ناكله من القمح والحبوب الاستراتيجية وفى الغالب ناخذه شحاته او بتعبير مؤدب شويه منحه زى ماحصل من كام يوم من الامارات
فمثلا على المستوى الشخصى احنا كان عندنا كام فدان وطبعا كنا عندنا مستاجرين لزراعة الارض كان بيجيلنا منها ملاليم ولايجوز زيادة قيمة الايجار حبينا نبيع الارض رفضوا المستاجرين الخروج من الارض
المهم من هنا لهنا بعنا الارض للمستاجرين بتراب الفلوس لان مافيش حد يرضى يشترى ارض وفيها مستاجر
بيعنا القراط اللى هو مائة اربعه وسبعين متر بخمسومية جنيها قهرا وظلما

دلوقتى الفلاح اللى اشترى منا الارض بيبيع المتر بسبع تلاف جنيه وهو راكب الجاموسه بتاعته وماسك الايس كريم فى ايده بعد ماحقق ملايين من الهوا بقوة قانون العدالة الاجتماعية

وطبعا بعد ما الارض الزراعيه كلها خلصت واتحولت لمبانى اتحركت الحكومة واصدرت قرار بتسليم الاراضى الزراعيه للملاك للحفاظ عليها
بس ياخساره القانون طلع وما اتنفذش لان مابقاش عندنا اراضى زراعيه
تحيا الحكومة وتحيا الثورة وانجازاتها الزراعيه

مجانية التعليم

اى حد دلوقتى عنده اولاد فى التعليم هايعرف ازاى بقت مجانية التعليم فى مصر المدارس بتاخد مبالغ خرافيه فوق قدرة المصريين وحط كمان ميزانيه اسمها الدروس الخصوصية التى اثقلت كاهل كل اسره وياريت الاولاد بيتعلموا حاجه شوية معلومات تتحشر فى الدماغ يوم الامتحان يفرغوها وكان الله بالسر عليم
وكل يوم تجربة جديده فى التعليم ثم يتم الغاؤها وتنفيذ تجربة جديده اخرى
شيل خمسه ابتدائى حط خمسه ابتدائى لا الثانويه على سنتين والاختراعات كتير والقوانين اكتر
تحيا الحكومة تحيا الثورة وانجازاتها التعليمية وتجاربها

قانون ايجارات العقارات
اسمه فى الوسط القانونى قانون زينب لانه بيلغى القانون المدنى باستيكه ومايخليش عندنا فى مصرحاجه اسمها قانون مدنى
اساس القانون المدنى قاعده قانونية شهيره هى العقد شريعة المتعاقدين
هنا فى مصر القاعده دى اى حد يسمعها يقوله بلها واشرب ميتها يعنى
انا مثلا على المستوى الشخصى عندى عقارين يعتبر مكانهم متميز وكلهم ساكنين المهم بعد وفاة والدى مسكت العقود كلها لاقيت ان العقد بينص على ان فى حالة اذا قررت انى استرد اى شقه يجب اخطار المستاجر واستلم الشقة روحت للمحامى ضحك عليا وقالى طالما تاريخ العقد قبل سنة 96 يسرى عليه قانون العلاقه بين المالك والمستاجر يعنى تبل العقد وتشرب ميته الشقق دى من حق المستاجر كمان وورثته يعنى بيمتد العقد لاولاده كمان موت ياحماردى قوانين ثورة يوليو لتحقيق العداله الاجتماعية
عندنا المستاجرين ما شاء الله كل واحد عند بدل الشقه 3 وكمان فيلا
فى يوم صحيت الصبح لاقيت ساكن قاعد فى عربيته المرسيدس وبيشيل كل عفشه على عربيه نقل يعنى بيعزل عشان عقبالى وعقبال السامعين لانه بنا فيلا كبيره فى اكتوبر ليه وللاولاده قلت ما شاء الله ربنا يكرمه كده حل عليا مشكله كبيره وهاتجوز فى ملكى مش هاخرج اشوف شقه بره
وقعدت مستنى الاخ يجى يشكرنى ان احنا اوناه الفتره اللى فاتت دى كلها بايجار مايتجاوزش مائتان جنيها فى السنه يا الله ملاليم
بعد اسبوع جه ابنه اللى فى الثانوية العامة الشقه وجاب معاه سرير فقط لاغير
وقعد فى الشقه عشان يثبت حقه فيها ويمتد العقد ليه ومايسكنش فى الفيلا اللى ابوه بناها ما ابو بلاش كتر منه وده حق من حقوق الثوره لتحقيق العدالة الاجتماعية
روحت للمحامى قالى من حقه
استغربت هى دى العداله الاجتماعيه اللى قال عليها عبد الناصر املاكى ومغتصبه من غيرى وبقوة القانون

والامثله كتير عن اللى باعوا محتويات الشقق بتاعتى قدام عينى وقالولى لما نبقى نسلمك المفتاح بعد عمر طويل لاحفادك واحفادنا نبقى نشوف ايه ناقص ونرجعهولك

واللى طلب خلو رجل مبلغ مساوى لثمن الشقه وااقوله يا اخى ده ملكى انا مش ملكك انت حضرتك لما سكنت ما اخدناش منك لا ابيض ولا اسود يقولى اصل والدك الله يرحمه كان راجل طيب

ولما يكون فيه مصاريف صيانه ادفعها انا وبعد كده اشحتها من السكان يرد واحد يقولى واحنا مالنا انت المالك انت اللى لازم تدفع
ااقوله يا اخى ده مبلغ بقيمة ايجارك اربع سنين
يرد واحد تانى يقولى وماله ماتدفع مش عاملى فيها صاحب ملك ابوك الله يرحمه كان بيدفع لينا كل حاجه
ااقوله انا بقى ورحمة ابويا مش دافع ليكوا حاجه ويارب يتهد العقار فوق راسكم واستفاد قيمة الارض

فعلا بكده قدرنا نحافظ على ثروتنا العقاريه واموال الشعب ولم نهدرها وقدرنا نحقق المعجزة الكبيره هى لكل مواطن شقه وعشره كمان ونمشى فى الشوارع مانعرفش نختار ايه ولا ايه من كتر الشقق اللى معلق عليها يافطه شقه للايجار
تحيا الثوره وتحيا الحكومة وتحيا العدالة الاجتماعية


اليقين




ان قوانين ثورة يوليو والقوانين الوضعيه كلها لاتحقق العدل والامن والتقدم فالحل هو فى كتاب الله وشريعته لإن شريعة الإسلام صالحة مصلحة لأحوال الناس في كل زمان ومكان
ولا
يمكن أن يقال إن هناك زماناً لا تصلح له شريعة الإسلام
وقد جاءت النصوص الشرعية مبينة لذلك بياناً واضحاً جلياً فأمرت الناس إلى قيام الساعة بالتمسك بهذه الشريعة
قال الله سبحانه وتعالى:يَا أَيُّهَا الَّذِينَ آمَنُواْ اتَّقُواْ اللّهَ حَقَّ تُقَاتِهِ وَلاَ تَمُوتُنَّ إِلاَّ وَأَنتُم مُّسْلِمُونَ -102- آل عمران

ومن علامة صلاحية هذه الشريعة أن جعل الله لكل زمان طائفة تقوم بهذه الشريعة كما قال النبي صلى الله عليه وسلم "لا تزال طائفة من أمتي على الحق ظاهرة منصورة حتى يأتي أمر الله وهم على ذلك"


ومن مميزات هذه الشريعة إلى جانب صلاحيتها إلى كل زمان أنها شريعة عامة لايوجد شيء من أحوال الناس إلا ونظمته وبينته أتم بيان كما قال تعالى: وَنَزَّلْنَا عَلَيْكَ الْكِتَابَ تِبْيَانًا لِّكُلِّ شَيْءٍ -89- النحل


ومن ممزيات هذه الشريعة أنها تجلب المصلحة للناس في دنياهم وفي آخرتهم كما قال تعالى: وَمَا أَرْسَلْنَاكَ إِلَّا رَحْمَةً لِّلْعَالَمِينَ -107- الأنبياء
وقال تعالى: الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلاَمَ دِينًا -3- المائدة
ومن هنا فمتى تمسك الناس بشريعة رب العالمين يسر الله لهم مصالح الدنيا ومصالح الآخرة

فقال تعالى :مَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُم بِأَحْسَنِ مَا كَانُواْ يَعْمَلُونَ 97- النحل
وإذا نظرنا الى تأثير هذه الشريعة على الناس كيف تبدلت أحوالهم
فإذا نظرنا في حال العرب قبل بعثة النبي صلى الله عليه وسلم كيف كانت أحوالهم وأوضاعهم سواء ما يتعلق بالعلاقات الاجتماعية أو فيما يتعلق بأحوالهم الأمنية وما يتعلق بقوة ومكانة العرب بين الأمم هذه الأحوال تبدلت لما تمسك الناس بهذا الهدي القويم الذي أرسل الله به نبيه صلى الله عليه وسلم، حتى فيما يتعلق بأمور النصر والمعيشة تبدلت الأًحوال ورفع الله بهذا الدين وبهذه الشريعة شأن العرب بين الأمم


وأخيرًا اقول لكل من صادر واستباح اموال الغير.. إنَّ من أهم مقاصد الشريعة حفظ الدين والنفس والعقل والنسل والمال‏ لقوله تعالى: ﴿لاَ تَأْكُلُوا أَمْوَالَكُمْ بَيْنَكُمْ بِالْبَاطِلِ﴾ النساء: من الآية 29


ولقوله صلى الله عليه وسلم: "إن دماءكم وأموالكم وأعراضكم عليكم حرام", وقوله صلى الله عليه وسلم: "لا يحل مال امرئ مسلم إلا بطيب نفسه"، فمن أهم حقوق الإنسان في الإسلام تحريم مصادرة الأموال وحجزها إلا بمقتضى شرعي


وهاقول فى الاخر تانى وتالت وعاشر زى الريس عبد الواحد ما قال تحيا الثوره تحيا انجازاتها

ملحوظه : دى وجهة نظرى الشخصيه التى لا تنتقص من احد وترفض امتداد قوانين من الممكن انها كانت مهمه فى وقتها انما الان لا تسمن ولا تغنى من جوع فهى قوانين عقيمة انى لا اهاجم اشخاص لانه ليسوا بينا ولكننى انتقد قوانين لم تاتى باى خير على المدى الطويل

23 comments:

رفقة عمر said...

طبعا اولا كل سنه وانت اقرب من الله بالف خيرو اكترصحه وسعادة وراحه بال ومحقق كل احلامك وامالك اللهم امين يارب العالمين

مع ان الموضوع طويل بس قريته كله لانه
شدنى جدا لان انا كمان حبيت فترة الثورة الاولى وحبيت اغانيها جدا ويمكن الاغانى كان ليها تاثير كبير لنجاحها
لكن لما بداوا ياخدوا من الناس اموالهم بغير وجه حق ومراكز القوى
حاسيت ان نفوسهم اتغيرت وخرجوا عن مبداهم الاساسيه وبدات الاهواء الشخصيه تتدخل
بس برضه اكيد لهم ايجابيات زى قانون التامينات والمعاشات
بس برضه النكسه دليل على فشل مبادائهم لان ربنا قال فى كتابه العزيز
ان الله لا يصلح عمل المفسدين
اعتقد لو كانوا خيرا ما كانت حدثت النكسه
موضوع بجد مهم جدا
ربنا يكرمك يارب ومشكور على المجهود الواضح فيه جدا
كل سنه وانت طيب مره تانيه
:)

أمــانــى said...

السلام عليكم
كل سنة وحضرتك طيب اها حضرتك بتعمل اعلان بدرى عن عيد ميلادك علشان ميكونش فى حجة علشان الهدايا متخافش حضرتك هديتك محفوظة واكيد هتوصلك
:D
ندخل بقى فى الموضوع
انا بقى بأحب الثورة وجمال عبد الناصر ده كفاية انه مكانش بيتخاذل عمره فى يوم ما ضحك الناس علينا كانت كلمته مسموعة فى الدنيا كلها
انا بقى الثورة لم تضيف لنا على المستوى الشخصى بس يكفى انه هو اول من اهتم بالصعيد وفعلا كان فيه مجانية التعليم احسن من دلوقتى
عبد الناصر والثورة كان نفسه يتقدم بمصر كان غلطته انه بيحب اصحابه واى حد بيحب مش بيقدر يشوف عيوبه محبوبه وهذا مع حدث مع عبد الناصر وانا طبعا لا انفى عنه المسؤلية ولكن بنظرة موضوعية لو كانوا ماشوا على نهج عبد الناصر مصر كانت اتقدمت فى مجال الصناعة والزارعة
الثورة وعبد الناصر مش السبب فى الكتل الخرسانة معلش بقى السبب فيه نظام يحكم مصر اكثر من 26 سنة ويمكن كمان السادات لان مصر محتاجة توسع واعادة هيكلة كل شئ من جديد وبناء مجتمعات زراعية ممتددة للاماكن القديمة حتى تكون هناك ارتباط نفسى
عبد الناصر والثورة لما كان بيعرف حد مخطئ مكانش بيرحمه حتى لو كان اقرب الناس اليه
معلش فى كلمة مش عاجبنى وعيب اوى التريقة على الفلاحيين قبل ان نلوم الفلاح ساعده ياخد حقه علشان يقدر يرجعلك حقك
عارف حقه فى العلاج والمأكل وبدل ضربات شمس وبدل فيرس سى وبدل فشل كلوى وبدل اسمدة وبدل وبدل هنقعد بكرة الناس دى ليها حقوق عندنا لازم نرجعها فلا الاول ليهم علشان نطالبهم بحقوقنا
تحية لك يا عبد الناصر اسكنك الله فسيح جناته ياااااااارب آمـــــــين
يكفى انه دخل خاوى الجيوب وخرج منها كما دخل
الموضوع محتاج وقت وعايزة ارد كويس بس معلش بقى واضح الانفعالية بتاعتى
وكلامى مش مرتب لانى بأحبه وبأحب الثورة مهما هيقولوا عليه بأحبه بأحبه
تحياتى لحضرتك

المستنصر بالله said...

ست رفقه هانم
انا زيك حبيت الاغانى جدا وحبيت الثورة جدا وكان نفسى بلدنا تكون احسن بلد فى الدنيا
وفعلا الثوره ليها ايجابيات انا باحترمها بس انا فى البوست ده ركزت على السلبيات عشان نقدر نصلح من انفسنا ونتقدم للامام
باعتذر ليكى على طول الموضوع بس انا بحب انهى الموضوع فى بوست واحد
سعيد دايما بتشريفك اليقين وتواصلك المستمر وارائك الممتازه اللى باستفاد منها ومن مواضيعك على مدونتك
تحياتى الكبيره ليك

المستنصر بالله said...

الاستاذه الكبيره امانى
اولا: انا بحب جمال عبد الناصر جدا ولحد وقت قريب كنت باعتبر نفسى ناصرى من ساسى لراسى لان مافيش اى حد يقدر ينكر وطنيته وحبه لمصر ولا ينكر عملين مهمين جدا فى حياة مصر والمصريين زى تاميم قناة السويس وبناء السد العالى وانا فى البوست ده بانتقد الوضع الحالى وما الت اليه قوانين الثورة العقيمة فيجب ان تتقبلى النقد بصدر رحب دون انفعال
ثانيا :اسمحيلى ارد على بعض اللى قولتيه
*جمال عبد الناصر كلمته كانت مسموعه فعلا انا فاكر مره سمعت خطبه ليه وهو بيقول على الملك فيصل ملك السعودية هانتفله دقنه شعره شعره وكمان نادى الملك حسين ملك الاردن باسم امه وقال حسين ابن زين موقف حضارى جدا ليه ماحدش يقدر ينساه
*انتى بتقولى غلتطه انه بيحب اصحابه وماشافش عيوبهم عندك حق ده من اهم صفات القائد الناجح هو انه يختار قواده ومعاونيه بناء على الصحوبيه والجدعنه والعلاقه اللى بينهم وطبعا هو بقى فى الحكم لحد سبتمبر 1970 حوالى 18 سنه فعلا وقت بسيط عشان يقدر يتقدم بينا ويعمل نهضه مش نكسة ولو استمر بهذا الحال كنا بقينا اكبر قوة عظمى فى العالم
*عاز ااقولك ان ثورة يوليو حولت باشوات مصر واعيانها الى فقرائها وازلائها بدون وجه حق ولا سبب مشروع وحولت عسكر يوليو الى باشوات من نوع جديد كل ما يفعله هو اخذ المزيد والمزيد ونهب ما يستطيع باستثناء الرئيس جمال عبد الناصر والتاريخ يشهد بذلك وان كان بعد وفاة اشرف مروان زوج ابنته بدات تدور اسئله كثيره كيف جمع كل هذه المليارات وان لم يكن زوج ابنة الرئيس جمال عبد الناصر كان يستطيع عمل ذلك
*عاوز اسالك اين مجوهرات اسرة محمد على الان التى صودرت للوطن مره قريت ان الملكه فريده قالت كنت باشوف مجوهراتى ومتعلقاتى يلبسهن زوجات الظباط
*اسالك تانى هل من الاسلام مصادرة املاك واموال مواطنين مصريين كل ما جنوه هو اجتهادهم وعملهم الدؤب وتوزيعها على مواطنين اخرين
*باسالك اين القطاع العام الان لقد بيع فى الخصخصه اين هو ايام الرئيس جمال عبد الناصر لقد ترك للنهب والسرقه وتحقيق خسائر مهوله
*هل تعرفى ان الأديب العالمي نجيب محفوظ توقف عن الكتابة حوالى ست سنوات بعد الثورة أحتجاجا علي الوضع المتردي ثم كتب بعد ذلك روايات تصف لنا التردي الحادث للمجتمع المصري بعد الثورة مثل الكرنك و ثرثرة فوق النيل
* هل تعرفى ان زمن النكسه والوكسه حدث فى عهد السيد الرئيس جمال عبد الناصر وبقينا نغنى فى الشارع الطشت قالى والسح اندح امبو وهاجر مثقفينا ومفكرينا خارج مصر هربا من زوار الليل
* هل تعرفى ان عسكر يوليو قاموا بتفريغ الحياة الأجتماعية و السياسية من مضمونها أصبح هناك حزب الاتحاد الاشتراكى وحزب نادى الاهلى وحزب نادى الزمالك بعد ما كان لدينا قبل الثوره حزب الوفد ومصر الفتاه والاحرار والكثير
* هل تعرفى ان قيمة الجنيه المصرى قبل الثوره كانت تساوى جنيه ذهب وكانت من اعلى عملتين قيمة على مستوى العالم
*هل تعرفى اول ضحيه للثوره كان قائدها واول رئيس جمهورى لمصر محمد نجيب أطاحوا به عندما قال أن دور العسكر أنتهي و علي العسكر أن يعودوا لثكناتهم
اانا باقولك جمال عبد الناصر شخص وطنى جدا الثورة على ايده ابتدت بامال كبيره وانتهت للا شىء
استاذه امانى اسف انى خليتك تنفعلى بس دى وجهة نظرى الشخصيه المتواضعه باشكرك كتير على تعليقك وعلى تشريفك اليقين ومتابعة مواضيعه
تحياتى

kochia said...

اولا كل سنة وانت طيب

وعلي فكرة انا كمان عيد ميلادي 23 يوليو

بس مش 1952

وبحب عيد ميلادي جدا ومقدرة وفاهمة حبك ليه طبعا
بحب اغاني الثورة وبحب افلام الثورة وبتفرج علي فيلم رد قلبي كل سنة ليلة عيد ميلادي
وحبيت الثورة من حبي لعبد الناصر واقتناعي انه رغم اخطائه لكن كان مخلص وعمل اللي اعتقد انه صح وصالح للبلد وتنحي عن الحكم لما حس انه خذل الناس اللي بيحبوه
حاجة دلوقتي ميعملهاش حد ولو العالم كله غرق بسببه في البحر بل يقول انا
ومن بعدي الطوفان

وحبيت الثورة من حب معظم اهلي فيها لانهم حسوا انهم ليهم كرامة وكينونة بعدها .. عمرهم ما كان ليهم القاب وحسوا بعدها انهم متساويين مع ذوي الالقاب
حاجات بسيطة اوي مزودتهمش معيشة ولا فلوس ولا ارض
لكن كرامة ورفعة واحساس بالحرية

وعجبتني قوانين الثورة لما قريتها وفهمتها
لكن انا مش بعتقد دلوقتي اننا دولة الثورة
الثورة دي كانت من كام سنة 56 سنة ؟؟

الناس دول مش بتوع الثورة
واحنا مش في بلد الثورة
ومفيش حاجة مطبقة من قوانين الثورة
وصحيح الثورة ليها اخطاء .. لكن ايه في بلدنا القانون اللي مالوش اخطاء ؟؟
دي كانت مرحلة وخلصت

مش فاضل منها الا استمتاعي بيوم مميز جدا لعيد ميلادي

ولك اكيد

تحياتي

عايش... ولكن !!!! said...

اولا كل سنه وانت طيب
وعلى فكره انا من مناصرى عبد الناصر جدا
برغم ان ليهم بعض السلبيات
بس اى عمل فيه ايجابيات وفيه سلبيات مادام العمل ده مش تبعا للقران والسنه
على فكره مدونتك عجبتنى جدا
انا قريت فيها كذا بوست عجبونى وان شاء الله توم الزيارات
تحياتى
علاء

حـــــدوتـــــة said...

السلام عليكم

المشكلة دلوقت ان بقى فيه كلام كتير عن عيوب الثورة وفسادها ويمكن ده لان كل انجازتها ضاعت على يد الحزب الوطنى العملاق
فيمكن مش عايزين حد يقول انهم هما اللى ضيعوا انجازتها

سلالالالالالالالالالالالالالالالام

المستنصر بالله said...

استاذه كوشيا

كل سنه وحضرتك طيبه
اكيد الثورة كانت عامله حاله شعوريه جميله فى بداياتها ولكنها خرجت عن مبادئها عندما تتدخلت المصالح الشخصيه والاهواء وبتقولى مافيش القاب الالقاب عاجت مره اخرى اكثر من الاول والاقطاع رجع تانى بشكل ابشع من الاول
بعد حقبه من الزمن وبعدنا عن شريعه الله وقوانين الله وتعاملنا مع قوانين البشر اكتشفنا انها لا تلائم جميع البشر لانها تميز ناس عن ناس
لكن شرع الله يساوى بين جميع البشر
الثورة كانت حلم جميل صاحينا منه على كابوس

مع تحياتى

المستنصر بالله said...

استاذ عايش ولكن

شرفتنى وتسعدنى مرورك جدا
كلنا حبينا ناصر جدا لانه كان رمز للبطل القومى ولكن محاباته لاصحابه ووثقته الزائده فيهم ضعيت منه حلمه الجميل ولم يكتمل
سعيد برايك بالمدونه ويشرفنى مرورك دائما

مع تحياتى

المستنصر بالله said...

حدوته

شرفتنى ويسعدنى تعليقك دايما
ماهما نفس العسكر برضه اللى بيحكموا من يوم الثورة مش صفوت الشريف من نتاج الثورة يعنى هما امتداد لها بس كل واحد نسى مصلحه الشعب والبلد وافتكر مصلحته الشخصيه هو بس

مع تحياتى

عطر الليل said...

بغض النظر لاني ولا بحب السياسة ولا بطيق عبدالناصر
احب اقولك كل سنة وانت طيب
والسنة اللي جاية محقق كل امانيك واحلامك
ومعاك اولادك ملين عليك البيت
وان شاء الله افرح فيك قريب جدا
قول يارب
xoxox

منى said...

كل سنه وانت بالف خير

عبد الناصر حب مصر اوى وحب لها الخير اوى
لكنه الحب اللى ممكن يخنق
خوفهم على الثوره خلى ناس كتير تخاف حتى تتكلم
ولما اللى شايف الغلط ميتكلمش يبقى الغلط مش هيتصلح
واللى كان بيجرؤ كان بيلاقى مكان دايما ورا الشمس

لكن منكرش انى سمعت بنفسى قصص عن ناس
بسيطه جدا كان عبد الناصر بيقابلهم ويدخل بنفسه لحل مشاكلهم دلوقتى صعب حتى انك تقابل رئيس مجلس المدينه

اى نظام ممكن يكون ليه عيوبه
لان زى ما قلت ده نظام وضعى
لكن مميزات مبادئ الثوره اكتر من عيوبها المشكله كانت فى التطبيق
وناس كتير عانت من التاميم ده رغم انهم مش اقطاعيين ولا حاجه

تعرف المشكله الحقيقيه دلوقتى ايه
ان زمان ايام الاحتلال كان الحلم
التخلص من السيطره الاجنبيه والاقطاعيين من العائله المالكه والاجانب وما اشبه
دلوقتى الاجانب شاريين البلد بفلوسهم والحكومه المصريه اللى بتبيع بكامل ارادتها
والاقطاع الجديد رجال الاعمال المصريين اللى ممكن يكونوا احفاد واولاد الريس عبد الواحد
بس مبقوش يحسوا باللى كانوا زيهم

موضوعات حضرتك دايما طويله لكن بتجبرنا نقراها للنهايه للتمام الاستفاده
فجزاك الله خيرا
تحياتى

المستنصر بالله said...

استاذه عطر الليل

شرفتينى وسعيد بمرورك على اليقين
وحضرتك بالف خير
رينا يستجب منك دعواتك ربنا ييسر لنا الامور

مع تحياتى

المستنصر بالله said...

استاذه منى

دايما بيسعدنى مرورك اليقين
تعليق حضرتك مهم جدا وافادنى جدا
فعلا هو حبها بطريقه تخنق جعلته لا يرى اخطائه واخطاء من حوله ظنا منه انهم مافيش حد بيحبها قدهم
واكيد كانت القوانين وقتها كويسه لكن الان هى عقيمه ولازم تتغير
عندك حق ان اولاد الريس عبد الواحد بقوا بشوات هذا الزمان بس بشكل اقبح من بشاوات زمان
وطبعا اوافقك جدا انهم باعوا البلد بتراب الفلوس وبيقنا مستعمرين بيادينا لا بيد عمرو

مع تحياتى

Dina said...

صباح الخير يافندم
بوست حلو و مهم جدا واضح فيه تعبك الذهنى انك تجمع اطراف الموضوع كلها
بس انا ليا رأى جايز يكون منطقى :
1. انا متفقة معاك ان الثورة ف بداياتها كانت أهدافها نبيلة و مبادئها كانت بتوضح ده لكن زى م قلت لو نظرت حواليك علشان تعرف ايه منها اتحقق و ايه لا هتلاقى مفيش اى حاجة استمرت و رجع الاحتكار و الاقطاع من تانى و بئت العدالة الاجتماعية شبه منعدمة و الطبقة البرجوازية اللى افرزتها الثورة انقرضت مبآش فى وسط يا فوق اوى يا تحت اوى و الأهم بلاش ننكر ان العيب فينا ومش ف الثورة أو العكس العيب مشترك احنا فقدنا روح المثابرة و الاستمرار و التحدى و هى خانها ناس كتير من اللى ساعدوا على ولادتها .
2. و دى النقطة الأهم بالنسبالى بناء على ايه اى فرد من جيلنا ممكن يحكم على زعيم او رئيس من الرؤساء يعنى انت حبيت عبدالناصر من اغانى الثورة و مبادئها و حبه لمصر مع انك معشتش عصره و مكنتش مدرك اوى لعصر السادات و على م بدأت تعى كنت نت جيل مبارك هتقولى من التاريخ و الكتب طيب هاتلى 3 كتب متفقين على حدث واحد او شخص و ليه دايما بننسى ان القائد الأول للثورة و أول رئيس للجمهورية كان محمد نجيب مش ناصر و ليه تغاضيت عن سلبيات عصره من معتقلات و فساد و عبدالحكيم عامر و شمس بدران و صلاح نصر
بص انا مبحبش ناصر ولا بكره زى م انا مبكرهش السادات كل رئيس منهم ليه سلبياته و ايجابياته اللى يتحكم عليه بيهم من خلال واقع ظروف عصره اللى اقصده انا كجيل معاصرش الاحداث دى اللى بيشكل اتجاهاتنا و رأينا العام تجاهها هو الكتب و الوثائق و وسائل الإعلام و للأسف الشديد تلغبطك اكتر م ترسيك على بر لكن نقدر نحكم كويس على الزمن ده لأننا مدركين لكل ظروفه و مفرداته و ده اللى انت بتعمله ف مدونتك لانك معاصر ليه و عايشه
و نصيحتى اقأ السير الذاتية للرئيسين محمد نجيب و أنور السادات و انت تقدر تعرف خبايا عصر عبد الناصر و رجاله و أولهم صلاح نصر و لو مقدرتش توصل للكتب قولى و انا اسلفهملك تقراهم و هتمتحن فيهم كمان يا فندم

المستنصر بالله said...

استاذه دايان

شرفتينى
انا حاولت ابين ان مش باكره جمال لشخصه ولكنى كنت اعتقد ان الثورة جاءت لتحل لنا مشاكلنا وانها المنقذ لنا حتى كبرت ووعيت الحقيقه ورايت ان مبادئها لم يتحقق منها الا الشئ القليل جدا والان ارتدينا تانى لعصر ما قبل الثورة بشكل ابشع واشد قسوه
شكرا قوى على النصيحه
ان شاء الله اعمل بيها
:)

مع تحياتى

موناليزا said...

جميل هذا التحليل والنقد البارع وحقا نبهتنى الى معلومات كنت غافلة عنها فجزاكم الله خيرا

مدحت محمد said...

بدون نفاق ولا مجاملة مدونتكنا بعتبرها اجمد مدونة موجودة على بلوجر
ثرية بالمعلومات جدا

والتحليل فوق فوق الرائع

جنّي said...

السلام عليكم

اولا كل عام انت في خير

ثانيا لا احد ينكر ما قام به عبد الناصر وتدوينتك عنه ممتازة ولكن هل تعتقد فعلا انهم حققوا المبدأ الرابع الخاص باقامة حياة ديموقراطية لا اظن دا من وجهة نظري ..
والمبدا الخامس الخاص باقامة جيش قوي استنزف في اليمن وغيرها ثم تم القضاء عليه في نكسة 67
مجرد تساؤلات

اشكر سعة صدركم مقدما

المستنصر بالله said...

استاذه موناليزا

شكرا لحضرتك على تشريفك اليقين
جزاكى الله خيرا

مع تحياتى

المستنصر بالله said...

استاذ مدحت محمد

جزاك الله خيرا على رايك فى اليقين دة شرف ليا كبير
دائما يسعدنى مرورك على اليقين

مع تحياتى

المستنصر بالله said...

استاذ جنى

يسعدنى مرورك اليقين دايما
انا فعلا وضحت وجه نظرى فى مبادئ الثورة ووكان كل تركيزى على السلبيات
وبينت ان كل مبادئ الثورة لم يتحقق منها شئ وضيعت حقوق ناس كتير

مع تحياتى

عاشــــــ النقاب ـقــــة"نونو" said...

كل عام وحضرتك الى الله اقرب
فيه حاجة ملاحظاها
ربنا يستر
مش هتقول بقى حضرتك مرتبط او هترتبط بمين من المدونات زي ما وعدتنا ولا ايه
تحياتي